Isa 34 | NdeIBE | STEP | Sondelani lina zizwe, lilalele; zwanini lina bantu! Umhlaba kawulalele, lakho konke okukiwo, umhlaba, lakho konke okuvela kuwo!

Isaiah 34

Ukwahlulelwa kwezizwe

1 Sondelani lina zizwe, lilalele; zwanini lina bantu! Umhlaba kawulalele, lakho konke okukiwo, umhlaba, lakho konke okuvela kuwo!

2 UJehova uthukuthelele izizwe zonke, ulaka lwakhe luphezu kwezitha zabo zonke. Uzazibhubhisa ngokupheleleyo, uzazinikela ekubulaweni.

3 Ababuleweyo bakibo bazaphoselwa ngaphandle, izidumbu zabo zizanuka; izintaba zizacwila egazini labo.

4 Zonke izinkanyezi zasemazulwini zizanyamalala, umkhathi ugoqwe njengomqulu; wonke amaxuku ezinkanyezi azakuwa njengamahlamvu abunileyo evinini lanjengomkhiwa otshwabheneyo usiwa esihlahleni somkhiwa.

5 Inkemba yami isinathe yanela emazulwini; khangelani yehlela phezu kwe-Edomi ukulahlulela, abantu esengibabhubhise baphela.

6 Inkemba kaJehova igxanyuzwe egazini, igcwele amafutha – igazi lezimvu lelezimbuzi, amafutha ezinso zezinqama. Ngoba uJehova ulomhlatshelo eBhozira lokubulawa okukhulu kwezifuyo e-Edomi.

7 Izinkabi zeganga zizakufa kanye lazo, amathole azinkunzi kanye lezinkunzi ezinkulu. Ilizwe labo lizagcwala igazi, umhlabathi uzakuba manzi ngamafutha.

8 Ngoba uJehova ulosuku lokuphindisela, umnyaka wokujezisa, ukuqinisa injongo yeZiyoni.

9 Izifula zase-Edomi zizaphendulwa zibe yingcino, umhlabathi wakhona ube ngumlilo wesolufa, ilizwe lakhona lizakuba yingcino etshayo!

10 Aliyikucitshwa ebusuku lemini; intuthu yalo izathunqa kokuphela. Lizakuba ngelichithiweyo kusukela kusizukulwane kusiya kusizukulwane; kakho ozadabula phakathi kwalo futhi.

11 Isikhova sasenkangala lomandukulo kuzakwakha kulo; isikhova esikhulu lewabayi kuzakwakha izidleke zakho kulo. UNkulunkulu uzakwelulela phezu kwe-Edomi intambo yokulinganisa incithakalo lentambo yokulinganisa ukutshabalala.

12 Izikhulu zalo kaziyikuba lalutho khona olungathiwa ngumbuso, wonke amakhosana alo azanyamalala.

13 Izinqaba zalo zizagcwala ameva, imbabazane lokhula kugcwale kuziphephelo zalo. Lizakuba yindawo yamakhanka, lomuzi wezikhova.

14 Izinyamazana zenkangala zizahlangana lezimpisi, amagogo azakhalelana; izidalwa zebusuku zizacambalala khona zizifunele izindawo zokuphumula.

15 Isikhova sizakwakha isidleke khona sibekele amaqanda, sizawachamusela, sifukamele abantwana baso ngaphansi komthunzi wezimpiko zaso, lemizwazwa izabuthana khonapho, yilowo lalowo lomngane wawo.

16 Khangelani encwadini kaJehova lifunde okuthi: Akukho lakunye kwalokhu okuzasweleka; akukho okuzaswela umngane wakho. Ngoba nguJehova onike umlayo, loMoya wakhe uzazigoqela ndawonye.

17 Uzakwahlukanisela izabelo zakho, isandla sakhe sizabe ngesilinganiso. Isabelo sizakuba ngesakho kokuphela, njalo kuzahlala khona kusukela kusizukulwane kusiya kusizukulwane.